首頁 » » 玉桂山非親子山徑 兒童不宜

玉桂山非親子山徑 兒童不宜

作者:Lena 發表日期:2017-06-01 23:46:01 分類:

港鐵南港島線已通車接近五個月,位處於鴨脷洲的玉桂山突然成為行山熱點,咪少看呢條來回5公里都冇嘅路線,其陡峭程度絕對不宜作為親子活動,更唔好學部分少女咁,穿拖鞋邊行邊用自拍棍Selfie。想喺炎夏嚟之前走轉玉桂山,於海拔196米的高處欣賞香港仔海峽及南中國海的無邊際景色,出發前記得做好準備,搵個有經驗嘅朋友帶路,玩得安全重要過Facebook多個Like嘛,係咪?

要征服玉桂山,再經過連島沙洲去鴨脷排燈塔,對有經驗的山友嚟講並唔算難,不過沿途都是沒有修葺的天然路,若平日冇行開山或做運動,只是抱住人去我又去的柴娃娃心態,咁呢度就唔多啱你,尤其諗住帶埋小朋友登山的父母要多加注意,呢段路絕對兒童不宜!近年,香港掀起行山、露營熱潮,好多山友早已行勻香港四徑,悶悶地想發掘下新地方、又要交通方便,路程短短地嘅玉桂山確是好選擇,喺港鐵利東站一出就係商場,可以先搵間餐廳醫個肚、買定適量糧水才出發,帶漏嘢都可即時補給。經過鴨脷洲街坊學校及配水庫遊樂場入口,步行數分鐘便會見到鴨脷洲(海水)配水庫,登山入口就在鐵絲圍網的左方,非常易搵。

進入登山路段後,一直去到鴨脷排燈塔都是崎嶇野路,期間更需要小量攀爬,加上沿途冇乜樹,要有心理準備曝曬數小時,緊記要帶夠水及做好防曬,飲用水最少都要1至1.5升,炎熱日子要預更多,千祈唔好貪輕懶拎,缺水的後果可以好嚴重。

沿配水庫圍網旁的小徑上山,不久便會見到分岔路,左、中、右三路都是登頂路線,今次揀最熱門的中路嚟行,睇下難度去到邊。老實講,人稱「有繩路線」的中路,其實都幾崎嶇、坡度又大,每檻上一步都幾費力,雖然有人在部分路段釘了麻繩,實情卻危機四伏,很多地釘不是鬆脫就是甩掉,當日見不少遊人上、落山靠晒條又霉又舊的麻繩借力,見到都覺得牙煙,寧可行下抖吓慢慢上都唔好過分依賴。上到玉桂山頂,景觀相當遼闊,海洋公園、南丫島以至南中國海景色盡入眼簾,過了標高柱再向南行,就會見到連島沙洲及鴨脷排,燈塔位置就在鴨脷排的最南方,想扮文青影相,要再多翻一個山啊!

要前往鴨脷排,必先從玉桂山頂下降至海平面的連島沙洲,其中有一半路都相當陡峭,甚至要坐住咁落,莫講話要帶住小朋友,冇行開山嘅大人都唔係咁易應付,落雨及潮濕日子隨時跣到一仆一碌。落到連島沙洲,環境係幾正嘅,不過垃圾就多咗啲喇,有啲煞風景。還要留意的地方是沙洲在天文大潮的日子有機會淹沒,唔想過咗去返唔到轉頭,記得揀啱日子及Check清楚潮汐資料,被困要人救就唔好啦!走過連島沙洲,再登上68米高的鴨脷排並繼續向南方下降至海邊,便會見到白色的燈塔,坐在岸邊歎海風,寫意到爆。有啲人回程會玩「綑邊」,但危險度實在太高,不建議咁做。據行山人士講,假日不時有街渡喺鴨脷排兜客,安唔安全、有冇保險就答唔到你,搭唔搭自己衡量。


本文来源:http://hk.on.cc/hk/bkn/cnt/lifestyle/20170520/bkn-20170520120015985-0520_00982_001.html

Tag:
本文鏈接:http://www.bbqbarbecues.com/9895.html